ភ្នំពេញ៖ រថយន្តទូរីសដឹកដែកចងមិនជាប់ដាច់ធ្លាក់ត្រូវរថយន្តដែលបើកនៅពីមុខ បណ្តាលឲ្យ​បែកកញ្ចក់ផ្នែកខាងក្រោយសំណាងហើយពុំមានអ្នករងរបួស។ ហេតុការណ៍ធ្វេសប្រហេះនេះបានកើតឡើងនៅវេលា ម៉ោង៤និង០០នាទី ថ្ងៃទី៥ ខែកក្កដា ឆ្នាំ​២០១៧​ នៅចំណុចមុខវត្តទឹកថ្លា ផ្លូវសហព័ន្ធរុស្សី ភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ​។

អ្នកឃើញហេតុការណ៍បានឲ្យ​ដឹងថា មុនពេលកើតហេតុមានរថយន្ត១គ្រឿងម៉ាក Mitsubishi ពណ៌ស្កពាក់ស្លាកលេខ ភ្នំពេញ 2O​-2121 ក្នុងទិសដៅពីកើតទៅលិច លុះមកដល់ចំណុចកើតហេតុ ក៍មានរថយន្ត​ទូរីស១គ្រឿងព័ណលឿងពាក់ស្លាក​លេខភ្នំពេញ 2K-0261 បើកបរដោយបុរសម្នាក់ពុំស្គាល់អត្តសញ្ញាណក្នុងទិសដៅស្របគ្នាពីកើតទៅលិច ដោយមានដឹកដែកទីបជ្រុងចងលើដំបូលរថយន្ត​ពេលនោះរថយន្ត Mitsubishi បានបន្ថយល្បឿន​ ដោយស្ថានភាពផ្លូវបំបែកមានយាន្តជំនិះឆ្លងកាត់ច្រើន ស្រាប់តែរថយន្តទូរីសក៍ចាប់ហ្វាំងដែរ​ បាន​ធ្វើឲ្យ​ដែកដែលចងលើដំបូលរថយន្តទូរីសនោះ របូតធ្លាក់មកត្រូវរថយន្តដែលបើកពីមុខបណ្តាលឲ្យ​បែកកញ្ចក់ផ្នែកខាងក្រោយតែមិនមានអ្នករងរបួសនោះទេ។

សមត្ថកិច្ចដែលចុះទៅដល់កន្លែងកើតហេតុបាននិយាយថា មូលហេតុដែលនាំឲ្យ​មានករណីនេះកើតឡើង គឺដោយសារតែអ្នកបើកបររថយន្តទួរីសខ្វះការប្រុងប្រយ័ត្ន មិនព្រមចងដែកនោះឲ្យ​ជាប់។ ក្រោយកើតហេតុអ្នកបើកបររថយន្តទូរីសបានធ្វើការសម្របសម្រួលជាមួយម្ចាស់រថយន្តរងគ្រោះដោយសងសំណងថ្លៃជួសជុលចំនួន៨០០ដុល្លាដើម្បីបញ្ចប់រឿង៕ អត្ថបទដោយ​៖​ អ្នកប្រម៉ាញ់ទីក្រុង​